शाहू महाराज यांच्यावर वाढदिवसानिमित्त शुभेच्छांचा वर्षाव
शुभेच्छा देण्यासाठी नवीन राजवाड्यावर सर्व क्षेत्रातील मान्यवरांची मांदियाळी
कोल्हापूर :
कला, क्रीडा, शैक्षणिक, सामाजिक यासह विविध क्षेत्रात आपल्या उत्तुंग कामगिरीने ठसा उमटविलेल्या खासदार शाहू महाराज छत्रपती यांचा ७७ वा वाढदिवस मंगळवारी (सात जानेवारी) उत्साहात साजरा झाला. त्यांना शुभेच्छा देण्यासाठी सकाळपासूनच नवीन राजवाड्यावर विविध क्षेत्रातील मान्यवरांनी प्रचंड गर्दी केली. यानिमित्त विविध उपक्रमांचेही आयोजन केले होते. सामाजिक उपक्रमांची जोड दिली होती. क्रीडा स्पर्धा आयोजित केल्या होत्या. त्याला उदंड प्रतिसाद मिळाला. जनतेच्या अमाप प्रेमाने छत्रपती कुटुंबीय भारावून गेले. देशभरातील नामांकित व्यक्तींनी त्यांना फोन करुन शुभेच्छा व्यक्त केल्या.
गेल्या अनेक वर्षापासून शाहू महाराज छत्रपती यांनी शैक्षणिक सामाजिक क्रीडा या विविध क्षेत्रात भरीव कामगिरी करत आहेत याच कामगिरीमुळे त्यांची लोकप्रियता वाढली. त्यांचा साधेपणा लोकांना भावला त्यामुळे ते लोकसभा निवडणुकीत दीड लाखावर मतांनी निवडून आले. गेल्या सहा महिन्यात खासदार म्हणून त्यांनी अतिशय चांगलं काम सुरू केले आहे. या सगळ्या पार्श्वभूमीवर खासदार झाल्यानंतरचा त्यांचा पहिलाच वाढदिवस सात जानेवारी रोजी झाला. या निमित्त शुभेच्छा देण्यासाठी सकाळपासूनच राजवाड्यावर विविध थरातील लोकांनी गर्दी केली.सर्वांनी त्यांना दीर्घायुष्याच्या शुभेच्छा दिल्या. यानिमित्त क्रीडा स्पर्धा व विविध उपक्रम राबवण्यात आले त्यालाही चांगला प्रतिसाद मिळाला.नवीन राजवाडा परिसरात उभारलेल्या मंडपामध्ये खासदार शाहू महाराज यांनी सकाळपासूनच सर्वांच्या शुभेच्छा स्वीकारल्या. विधान परिषदेतील काँग्रेसचे गटनेते आमदार सतेज पाटील, आमदार जयंत आसगावकर, शिवाजी विद्यापीठाचे कुलगुरू डी टी शिर्के, जिल्हाधिकारी अमोल येडगे, विशेष पोलीस महानिरीक्षक सुनील फुलारी, जिल्हा परिषदेचे कार्यकारी अधिकारी एस कार्तिकेयन, महानगरपालिकेच्या प्रशासक आयुक्त के मंजूलक्ष्मी, इतिहास संशोधक जयसिंगराव पवार, माजी महापौर आर के पोवार, महादेवराव आडगुळे, राष्ट्रवादी पक्षाचे जिल्हाध्यक्ष व्ही बी पाटील, गोकुळचे माजी अध्यक्ष विश्वास नारायण पाटील, कर्नल कल्लोळी बसवराज यांनी शुभेच्छा दिल्या.
शिवसेनेचे सहसंपर्कप्रमुख विजय देवणे, आरटीओ संजय भोर, प्रिन्स शिवाजी मराठा बोर्डिंगचे चेअरमन के.जी पाटील, काँग्रेसचे शहराध्यक्ष सचिन चव्हाण, माजी उपमहापौर अर्जुन माने, संजय मोहिते, विक्रम जरग, स्थायी समितीचे माजी सभापती शारंगधर देशमुख, चेंबर ऑफ कॉमर्सचे माजी अध्यक्ष आनंद माने, बाळ पाटणकर, भाकपचे सतीश कांबळे, जिल्हा बँकेचे संचालक ए वाय पाटील, काँग्रेसचे राहुल देसाई, करण गायकवाड, अजित नरके, अनिरुद्ध पिंपळे यांच्यासह विविध क्षेत्रातील मान्यवरांनी भेट घेऊन शुभेच्छा व्यक्त केल्या.
सकाळी शाहू महाराज यांनी करवीरनिवासिनी अंबाबाईचे दर्शन घेतले. त्यानंतर शाहू विद्यालयात मुलांच्या समवेत त्यांनी वाढदिवस साजरा केला. या वाढदिवसाच्या निमित्ताने फुटबॉल व विविध स्पर्धा घेण्यात आल्या. माजी खासदार संभाजीराजे, संयोगिताराजे, माजी आमदार मालोजीराजे, मधुरिमाराजे, यश राजे यशस्विनीराजे, यशराजे यांनी सर्वांचे स्वागत केले.
