*केडीसीसी बँक जाणार व्यापारी, व्यावसायिक व उद्योजकांच्या दारात*
*ग्राहकांना क्यूआर कोड स्टँडीसह साउंड बॉक्स सुविधा देण्याची मोहीम*
*पालकमंत्री व बँकेचे अध्यक्ष हसन मुश्रीफ यांची माहिती*
*डिजिटल बँकिंगमध्ये जिल्हा बँक अग्रेसर*
*दोन महिन्यात एक लाखावर ग्राहकांपर्यंत पोहोचण्याचे उद्दिष्ट*
*खातेदारांचा भरघोस विमा उतरविण्याचा मानस*
*बँकेच्या संचालक मंडळाच्या बैठकीत महत्त्वपूर्ण निर्णय*
*कोल्हापूर, दि. ३१:*
*कोल्हापूर जिल्हा मध्यवर्ती सहकारी बँकेची शेतकऱ्यांशी घट्ट नाळ आहेच. बँक आता छोटे -मोठे दुकानदार, व्यापारी, व्यावसायिक आणि उद्योजकांच्या दारात जाणार आहे. बँकेच्यावतीने क्यूआर कोड स्टॅन्डीसह साउंड बॉक्स सुविधा पुरविण्याची महत्वकांक्षी मोहीम हाती घेतली आहे. त्या अंतर्गत येत्या दोन महिन्यात एक लाख ग्राहकांपर्यंत क्यूआर कोड पोहोचवण्याचे उद्दिष्ट निर्धारित केले आहे. या ग्राहकांना बँकेच्यावतीने भरघोस विमा सुविधा देण्याचा बँकेचा मानस आहे.*
*आजच्या संचालक मंडळाच्या बैठकीमध्ये हा निर्णय झाल्याची माहिती महाराष्ट्राचे वैद्यकीय शिक्षण व विशेष सहाय्य मंत्री तथा; कोल्हापूर जिल्ह्याचे पालकमंत्री व बँकेचे अध्यक्ष हसन मुश्रीफ यांनी दिली. या मोहिमेत सर्व संचालकांसह अधिकारी व कर्मचाऱ्यांनी झोकून देऊन काम करण्याचे आवाहन, अध्यक्ष श्री. मुश्रीफ यांनी केले.*
*बँकेकडे ठेवींचा ओघ मोठा आहे. रिझर्व बँकेने एकूण ठेवींमध्ये चालू खात्याच्या व बचत खात्यांच्या ठेवी म्हणजेच कासा ठेवीचे प्रमाण किती असावे, याचे नियम घालून दिले आहेत. या ठेवींची पूर्तता अधिक चांगली होण्यासाठी बँकेने ही मोहीम हाती घेतली आहे. या अत्याधुनिक सुविधेमुळे ग्राहकांचा वेळ व प्रवासाची बचत होऊन कार्यालयांसह घरबसल्या सुविधा मिळणार आहे. या योजनेच्या प्रचार आणि प्रसारासाठी कोल्हापूर शहरासह प्रत्येक तालुकास्तरावर संबंधित संचालकांमार्फत प्रयत्न केले जाणार आहेत. या मोहिमेची सुरुवात पालकमंत्री व अध्यक्ष श्री. मुश्रीफ कागलपासून स्वतः करणार आहेत.*
*याबाबत अधिक माहिती अशी, बँकेने गेल्या आर्थिक वर्षाअखेर २४० कोटी रुपयांचा उच्चांकी ढोबळ नफा कमविलेला आहे. कोल्हापूर शहरासह सबंध जिल्हाभरातील तालुक्याची गावे, मोठ्या बाजारपेठा, मोठी गावे व इतर ठिकाणचे व्यापारी, व्यावसायिक व उद्योजकांकडे जाण्यासाठी बँकेने ही मोहीम हाती घेतली आहे . कारण; असे दुकानदार, व्यवसायिक, उद्योजक व व्यापाऱ्यांना त्यांच्या कामाच्या व्यापातून दररोज बँकेकडे येता येत नाही. त्यामुळे या माध्यमातून बँकच त्यांच्या दारी चाललेली आहे. दरम्यान; रिझर्व बॅंकेने व नाबार्डने दिलेल्या एक्सपोजरच्या मर्यादेमुळे कर्ज देताना मर्यादा आलेली आहे. त्यासाठी ग्रामपंचायती, किराणा दुकानदार, हॉटेल व्यवसायिक, व्यापारी हे छोटे व्यावसायिक, बांधकाम व्यावसायिक, दुकानदार, भाजीपाला विक्रेते आदी व्यावसायिकांशी ठेवीदार ग्राहक म्हणून संबंध प्रस्थापित होणे हे अतिशय महत्त्वाचे आहे. त्यासाठी क्यू आर कोडसह साउंड बॉक्स सुविधा पुरविण्यात येणार आहे. त्या माध्यमातून होणाऱ्या व्यवहारांमधून बँकेकडे कासा ठेवींचा ओघ वाढणार आहे.*
*याबाबत पालकमंत्री व बँकेचे अध्यक्ष हसन मुश्रीफ म्हणाले, केडीसीसी बँक ही शेतकऱ्यांची बँक असून प्रामुख्याने शेतकऱ्यांना कर्ज पुरवठा केला जातो. तसेच; साखर कारखाने, सूतगिरण्या, प्रक्रिया संस्था, खरेदी विक्री संघ अशा संस्थांसह व्यक्तींना कर्ज पुरवठा केला जातो. परंतु; रिझर्व बँक ऑफ इंडिया आणि नाबार्डच्या कर्ज मर्यादेच्या (एक्सपोजर) निकषांनुसार कर्जपुरवठा करण्यास मर्यादा येतात. याकरीता व्यापारी, दुकानदार, व्यावसायिक व उद्योजक असे ग्राहक बँकेस जोडणे महत्त्वाचे आहे. त्यासाठी अशा ग्राहकांना क्यूआर कोड देण्याचा निर्णय बँकेने घेतला आहे.*
*विनाशुल्क जोडणी…….!*
*ग्राहकांना ही सुविधा विनाशशुल्क जोडणावळ करून दिली जाणार आहे. क्यू आर कोडच्या व्यवहाराच्या माध्यमातून ग्राहकाला बँकेकडे त्याच्या इच्छेनुसार दैनंदिन संचयनी म्हणजेच पिग्मी खात्यामध्ये इच्छेनुसार रक्कम ठेवता येणार आहे. क्यू आर कोडसारख्या अत्याधुनिक व अद्ययावत सुविधेच्या माध्यमातून सुरक्षित मानवरहीत स्वयंचलित पिग्मी म्हणजेच भिशी सुविधा ग्राहकांना दिली जाणार आहे. या पिग्मीवर ग्राहकांना अत्यल्प व्याजदराचे कर्जही दिले जाणार आहे.*
ली
*आमदार पी. एन. साहेबांची खुर्ची यापुढे रिकामी राहील……!*
*बँकेच्या दर संचालक मंडळाच्या बैठकीच्या सुरुवातीला राष्ट्रीय, राज्य आणि जिल्ह्यातील निधन झालेल्या प्रमुख व्यक्तींना श्रद्धांजली वाहण्याची प्रथा आहे. आजची श्रद्धांजली बँकेच्या इतिहासात वेगळी होती. श्रद्धांजलीपर भाषणात मंत्री श्री. मुश्रीफ म्हणाले, स्वर्गीय आमदार कै. श्री. पी. एन. पाटील यांनी गेली ४० वर्षे बँकेचे संचालक म्हणून उत्कृष्ट कार्य केले. संचालक मंडळाच्या बहुतांशी बैठकांना ते उपस्थित असायचे. शेतकऱ्यांचे प्रश्न ते नेहमीच हिरीरीने मांडायचे. सभागृहातील ईशान्येकडील कोपऱ्यातील त्या खुर्चीत ते बसायचे. आज ती खुर्ची रिकामीच आहे. यापुढे त्या खुर्चीत ते कधीच दिसणार नाहीत, असे सांगतानाच मंत्री श्री मुश्रीफ भावूक झाले. ते पुढे म्हणाले, आमदार कै. श्री. पाटील यांनी बँकेत १९८४-८५ साली संचालक म्हणून कारकीर्द सुरू झाली. ते आजतागायत बँकेचे संचालक होते. १९९१ ते १९९५ या कारकिर्दीत अध्यक्ष म्हणून त्यांनी उत्कृष्ट काम केले. या पाच वर्षात कर्मचाऱ्यांना नियमित बोनससह एक पगार ज्यादा बोनस दिला. तसेच पीक कर्जांचे व्याजदर १२ टक्क्यांवरून सात टक्के एवढे कमी केले आणि भूमीन शेतकऱ्यांना खावटी कर्ज दिले.*
*यावेळी बँकेच्या ज्येष्ठ संचालिका व माजी खासदार श्रीमती निवेदिता माने यांच्या मातोश्री सुनीतादेवी घाटगे, बँकेचे माजी संचालक आर. के. पोवार यांच्या पत्नी सौ. यशोदा पोवार, उदय साखर कारखान्याचे संचालक पंडित शेळके, कसबा सांगावचे माजी सरपंच आप्पासाहेब पाटील, अत्याळ येथील जवान संजय शंकर पाटील, चांदेकरवाडी येथील जवान दयासागर खोत, काँग्रेसचे ज्येष्ठ नेते प्रतापराव भोसले, बँकेचे चंदगड शाखेचे व्यवस्थापक एन. एस. कांबळे, सिरसे येथील जवान गणपती पाटील यांना श्रद्धांजली वाहण्यात आली.*
*यावेळी उपाध्यक्ष आमदार राजूबाबा आवळे, आमदार राजेश पाटील, ए. वाय. पाटील, प्रताप उर्फ भैय्या माने, बाबासाहेब पाटील -आसुर्लेकर, संतोष पाटील, रणजीतसिंह पाटील, सुधीर देसाई, रणवीरसिंग गायकवाड, प्रा.अर्जुन आबिटकर, विजयसिंह माने, सौ. स्मिता गवळी आदी संचालक, कर्मचारी प्रतिनिधी दिलीप लोखंडे व आय. बी. मुन्शी व प्रभारी मुख्य कार्यकारी अधिकारी गोरख शिंदे उपस्थित होते.*
………………….
============